• Yetkinlik yaşına çatmayanların fiziki, əqli və mənəvi inkişafına ziyan vura bilən və kodsuz yayımlanan, o cümlədən erotikanı və qəddarlığı əks etdirən proqramlar üçün Xüsusi Qaydalar

     
    AZƏRBAYCAN RESPUBLİKASININ HÜQUQİ AKTLARIN DÖVLƏT REYESTRİ
     

     

     

    Aktın növü

    AZƏRBAYCAN RESPUBLİKASI MİLLİ TELEVİZİYA VƏ RADİO ŞURASININ QƏRARI

    Qəbul edildiyi tarix

    10.04.2015

    Qeydiyyat nömrəsi

    04/3

    Adı

    Yetkinlik yaşına çatmayanların fiziki, əqli və mənəvi inkişafına ziyan vura bilən və kodsuz yayımlanan, o cümlədən erotikanı və qəddarlığı əks etdirən proqramlar üçün Xüsusi Qaydalar”ın təsdiq edilməsi barədə

    Rəsmi dərc edildiyi mənbə

     

    Qüvvəyə minmə tarixi

    23.04.2015

    Azərbaycan Respublikasının Vahid hüquqi təsnifatı üzrə indeks kodu

    180.150.000

    Hüquqi Aktların Dövlət Reyestrinin qeydiyyat nömrəsi

    25201504100043

    Hüquqi aktın Hüquqi Aktların Dövlət Reyestrinə daxil edildiyi tarix

    22.04.2015

     

     

    Azərbaycan Respublikası Milli Televiziya və Radio Şurası “Televiziya və radio yayımı haqqında” Azərbaycan Respublikası Qanununun tətbiq edilməsi barədə Azərbaycan Respublikası Prezidentinin 5 oktyabr 2002-ci il, 794 nömrəli Fərmanının 6-cı bəndinin üçüncü abzasının tələblərini rəhbər tutaraq QƏRARA ALIR:

    1. “Yetkinlik yaşına çatmayanların fiziki, əqli və mənəvi inkişafına ziyan vura bilən və kodsuz yayımlanan, o cümlədən erotikanı və qəddarlığı əks etdirən proqramlar üçün Xüsusi Qaydalar” təsdiq edilsin (Əlavə olunur). [1]

    2. Milli Televiziya və Radio Şurasının 01 mart 2006-cı il tarixli qərarı ilə təsdiq edilmiş “Uşaqların və yetkinlik yaşına çatmayanların fiziki, əqli və mənəvi inkişafına ziyan vura bilən və kodsuz yayımlanan, o cümlədən erotikanı və qəddarlığı əks etdirən proqramlar üçün Xüsusi Qaydalar” ləğv edilsin.

    3. Hüquq və beynəlxalq əlaqələr şöbəsinin müdiri N.Cavadov təsdiq olunmuş Qaydanı 3 gün müddətində Azərbaycan Respublikasının Hüquqi Aktların Dövlət Reyestrinə daxil edilməsi üçün Azərbaycan Respublikası Ədliyyə Nazirliyinə təqdim edilməsini təmin etsin.

     

    Sədr                                                                        Nuşirəvan Məhərrəmov

     

     

     

    Azərbaycan Respublikası Milli Televiziya və Radio Şurasının 10 aprel 2015-ci il tarixli 04/3 nömrəli qərarı ilə təsdiq edilmişdir

     

     

    Yetkinlik yaşına çatmayanların fiziki, əqli və mənəvi inkişafına ziyan vura bilən və kodsuz yayımlanan, o cümlədən erotikanı və qəddarlığı əks etdirən proqramlar üçün Xüsusi Qaydalar[2]

     

    Ümumi müddəalar

     

    1. Bu Qaydalar “Televiziya və radio yayımı haqqında” Azərbaycan Respublikası Qanununun 33.1-ci maddəsinə uyğun olaraq hazırlanmışdır və yetkinlik yaşına çatmayanların fiziki, əqli və mənəvi inkişafına ziyan vura bilən və kodsuz yayımlanan proqramların yayımı qaydalarını tənzimləyir.

    2. Yetkinlik yaşına çatmayanların fiziki, əqli və mənəvi inkişafına ziyan vura bilən və kodsuz yayımlanan, o cümlədən erotikanı və qəddarlığı əks etdirən proqramların saat 07.00-dan saat 23.00-dək yayımına yol verilmir.

     

    Yetkinlik yaşına çatmayanların fiziki, əqli və mənəvi inkişafına ziyan vura bilən və kodsuz yayımlanan, o cümlədən erotikanı və qəddarlığı əks etdirən proqramlar

     

    3. Yetkinlik yaşına çatmayanların fiziki, əqli və mənəvi inkişafına ziyan vura bilən və kodsuz yayımlanan, o cümlədən erotikanı və qəddarlığı əks etdirən proqramlara aid edilir:

    3.1. Fiziki və ya psixi zorakılığın təsvirinin, sadizmin, vandalizmin və bu kimi qəddarlıq səhnələrinin, əzab və xəsarət yetirmənin, şikəst edilmənin, ölmüş və ya qəddarlıqla öldürülmüş cəsədin təsvir olunduğu səhnələrin yayımlanması;

    3.2. Qorxu və dəhşət səhnələrinin, okkult rituallarının, mistik təlimlərin, spiritizmin, qorxulu və dəhşətli məxluqların təsvir edildiyi səhnələrin yayımlanması;

    3.3. Tibbi əhəmiyyət kəsb edən, lakin insan psixikasına mənfi təsir edə bilən tibbi əməliyyatların açıq şəkildə yayımlanması;

    3.4. Hipnoz səhnələrinin təsviri, efir vasitəsilə hipnozetmə səhnəsinin yayımlanması;

    3.5. Kriminal fəaliyyəti özündə əks etdirən təsvirlərin, intihar, özünü şikəstetmə səhnələrinin və onların üsul və vasitələrinin yayımlanması;

    3.6. Şəhvət hissinin oyadılması, cinsi əlaqə aktının nümayişi və ya digər seksual təminolunmaların, seksual mənsubiyyətin göstərildiyi səhnələr və seksual münasibətlərdən bəhs edən söhbətlərin yayımlanması;

    3.7. Ədəbsiz ifadələrdən, sözlərdən və ya jestlərdən istifadə edilən səhnələrin yayımlanması;

    3.8. Spirtli içkilərin, narkotik vasitələrin, tütün məmulatlarının istifadə edildiyi səhnələrin yayımlanması;

    3.9. Qumar oyunlarının, idman mərc oyunlarının təbliği ilə bağlı səhnələrin yayımlanması.

     

    Yetkinlik yaşına çatmayanların fiziki, əqli və mənəvi inkişafına ziyan vura bilən və kodsuz yayımlanan, o cümlədən erotikanı və qəddarlığı əks etdirən proqramlara dair tələblərin pozulması

     

    4. Yetkinlik yaşına çatmayanların fiziki, əqli və mənəvi inkişafına ziyan vura bilən və kodsuz yayımlanan proqramlara dair tələblərin pozulması məsuliyyətə səbəb olur.

     

     

     

    İSTİFADƏ OLUNMUŞ MƏNBƏ SƏNƏDLƏRİNİN SİYAHISI

     

     

    1.       2 mart 2018-ci il tarixli 03/1 nömrəli Azərbaycan Respublikasının Milli Televiziya və Radio Şurasının Qərarı (Hüquqi Aktların Dövlət Reyestrinin qeydiyyat nömrəsi 25201803020031, Hüquqi Aktların Dövlət Reyestrinə daxil edildiyi tarix 7 mart 2018-ci il)

     

    QƏRARA EDİLMİŞ DƏYİŞİKLİK VƏ ƏLAVƏLƏRİN SİYAHISI

     

     

    [1] 2 mart 2018-ci il tarixli 03/1 nömrəli Azərbaycan Respublikasının Milli Televiziya və Radio Şurasının Qərarı (Hüquqi Aktların Dövlət Reyestrinin qeydiyyat nömrəsi 25201803020031, Hüquqi Aktların Dövlət Reyestrinə daxil edildiyi tarix 7 mart 2018-ci il) ilə qərarın adında və 1-ci hissədə “Uşaqların və yetkinlik” sözləri “Yetkinlik” sözü ilə əvəz edilmişdir.

     

    [2] 2 mart 2018-ci il tarixli 03/1 nömrəli Azərbaycan Respublikasının Milli Televiziya və Radio Şurasının Qərarı (Hüquqi Aktların Dövlət Reyestrinin qeydiyyat nömrəsi 25201803020031, Hüquqi Aktların Dövlət Reyestrinə daxil edildiyi tarix 7 mart 2018-ci il) ilə “Uşaqların və yetkinlik yaşına çatmayanların fiziki, əqli və mənəvi inkişafına ziyan vura bilən və kodsuz yayımlanan, o cümlədən erotikanı və qəddarlığı əks etdirən proqramlar üçün Xüsusi Qaydalar"ın adında və mətnində “Uşaqların və yetkinlik” sözləri “Yetkinlik” sözü ilə əvəz edilmişdir.

     

Yuxarı ^